असोज ३०,२०८२ काठमाडौं– नेकपा (एमाले) को केन्द्रीय कमिटीको बैठक दोस्रो दिन बिहीबार ललितपुरको जावलाखेलस्थित रामबाघ महलमा जारी छ। बिहान ८ बजेदेखि सुरु हुने भनिएको बैठक केही ढिलो गरी सुरु भएको हो।

बैठकमा अध्यक्ष केपी शर्मा ओलीले प्रस्तुत गरेको राजनीतिक प्रस्तावमाथि केन्द्रीय सदस्यहरूले धारणा राख्ने क्रम आज पनि जारी रहेको एमालेले जनाएको छ। बुधबार पहिलो दिनको बैठकमा ५० जना सदस्यहरूले आफ्ना धारणा राखेका थिए।

आज बाँकी केन्द्रीय सदस्यहरूले धारणा राख्ने कार्यक्रम रहेको छ। पार्टी स्रोतका अनुसार आज करिब १०० जना केन्द्रीय सदस्यले आफ्नो विचार राख्ने अनुमान गरिएको छ।

शुक्रबारभित्र बैठक टुंग्याउने भनिए पनि अधिकांश सदस्यहरूले धारणा राख्न चाहेकाले बैठक लम्बिन सक्ने संकेत देखिएको एमाले नेताहरूले बताएका छन्।