असोज २९,२०८२ काठमाडौं- जिल्ला प्रशासन कार्यालय काठमाडौंमा आजदेखि राहदानीसम्बन्धी सेवा पुनः सुरु भएको छ। गत भदौ २३ र २४ गतेको जेनजी आन्दोलनका क्रममा कार्यालय भवनमा भएको आगजनी र तोडफोडका कारण सेवा प्रभावित भएको थियो।

सहायक प्रमुख जिल्ला अधिकारी तथा सूचना अधिकारी मुक्तिराम रिजालका अनुसार अब राहदानी सेवा दुई सिफ्टमा सञ्चालन हुनेछ। बिहान ७ बजेदेखि साँझ ७ बजेसम्म सेवा उपलब्ध हुने जानकारी दिइएको छ।

अनलाइन आवेदन फारम भने साँझ ५ बजेसम्म मात्र खुला रहनेछ। अत्यधिक सेवाग्राहीको चाप र सीमित आवेदन स्टेशन भएकाले सेवाग्राहीहरूलाई पाँच बजेभित्रै उपस्थित हुन अनुरोध गरिएको छ। जिल्ला प्रशासन कार्यालयले सेवाग्राहीलाई समयमै सेवा लिन अनुरोध गर्दै सूचना जारी गरेको छ।