श्रावण ७,२०८२ काठमाडौं । नेपाल चिकित्सक संघले सरकारसँग भएको तीन बुँदे सहमति कार्यान्वयनमा देखिएको ढिलाइप्रति गम्भीर असन्तुष्टि जनाउँदै पुनः आन्दोलनमा जाने चेतावनी दिएको छ। संघका महासचिव डा. सन्जिव तिवारीद्वारा बुधबार जारी विज्ञप्तिमा सहमति पालना नहुँदा सरकारको विश्वसनीयतामाथि प्रश्न उठेको उल्लेख गरिएको छ।

असार २४ गते संघ र सरकारबीच उपभोक्ता संरक्षण ऐन लगायतका विषयमा सहमति भएको थियो। सहमति अनुसार कार्यदलले ७ दिनभित्र सुझावसहितको प्रतिवेदन बुझाउने भनिए पनि अहिलेसम्म कुनै ठोस प्रगति नभएको संघको आरोप छ। डा. तिवारीले सरकारका उच्च अधिकारीहरूसँग भएको सहमति पालना नहुँदा “भविष्यमा उनीहरूको प्रतिबद्धतामा विश्वास गर्ने आधार नरहने” बताए। संघले अबको आन्दोलन अझ सशक्त र व्यापक हुने चेतावनी पनि दिएको छ।