कात्तिक २, २०८० काठमाडौँ: नेपाली राष्ट्रिय फुटबल टोलीका खेलाडीले जनही ५१ हजार रुपैयाँ पाउने भएका छन् ।

फिफा विश्‍वकप अन्तर्गत एसिया प्रारम्भिक छनोट-१ पार गर्दै समूह चरणमा पुगेको नेपाली टोलीलाई अखिल नेपाल फुटबल संघ एन्फाले जनही ५१ हजार रुपैयाँ प्रदान गर्ने अध्यक्ष पंकजविक्रम नेम्बाङले घोषणा गरेका हुन् ।

प्रारम्भिक छनोटमा नेपालले लाओसलाई हराएको थियो। दशरथ रंगशालामा भएको पहिलो लेगको खेलमा १-१ गोलको बराबरी भएको थियो। दोस्रो लेगको खेलमा नेपालले लाओसलाई उसैको घरेलु मैदानमा १-० गोलले हराएको थियो ।

नेपालका लागि पहिलो लेगमा अञ्जन विष्ट र दोस्रो लेगमा मनिष डाँगीले गोल गरेका थिए। नेपालले दोस्रो चरणमा युएई, बहराइन र यमनसँग प्रतिस्पर्धा गर्नेछ ।