४ बैशाख २०७९, काठमाडौं : सत्ता गठबन्धनले सोमबार (भोलि) बेलुकासम्म महानगरपालिका र उपमहानगरपालिकाको भागवण्डा टुंगो लगाउने भएको छ । प्रधानमन्त्री निवास बालुवाटारमा बसेको पाँच दलीय सत्ता गठबन्धनको बैठकमा महानगर र उपमहानगर चुनावी तालमेलको टुंगो सोमबार लगाउने निर्णय भएको हो ।

देशैभर ७५३ स्थानीय तहमा पाँच दलीय गठबन्धन हुन नसक्ने भएपछि पहिलो चरणमा महानगर उपमहानगरको टुंगो सोमबार बेलुकासम्म लगाउने सहमति भएको बैठकमा सहभागी एक नेताले बताए ।

यदि महानगर उपमहानगरमा पाँचै दलको चित्त बुझ्दो भागबण्डा भएमा नगरपालिका र गाउँपालिकामा हुने चुनावी तालमेलका विषयमा छलफल गर्ने, र नभए आ–आफ्नै ढंगले प्रतिस्पर्धा गर्नेबारे छलफल भएको जानाकारी गराइएको छ ।