२४ मंसिर, २०७८ काठमाडौँ : सत्तारुढ दल नेपाली काँग्रेसको महाधिवेशन बुधबारदेखि राजधानीको भृकुटीमण्डपमा सुरु भएको छ । कोरोनाको नयाँ भेरियन्ट ओमिक्रोनको त्रास बढ्दै गएको बेला काँग्रेसको महाधिवेशन भइरहेको हो। कोरोनाका अन्य भेरियन्ट भन्दा सङ्क्रामक रहेको भनिएको सो भेरियन्टबाट आम सर्वसाधारण सचेत हुनुपर्ने बताइएको बेला काँग्रेसको महाधिवेशनमा भने हरिबिजोग अवस्था देखिएको छ।

हजारौँको सङ्ख्यामा भेला भएका नेता, कार्यकर्ता र शुभेच्छुकबीच भौतिक दुरी कायम गर्न सक्ने अवस्था त छैन नै सहभागीले पर्याप्त स्वास्थ्य सतर्कता अपनाएको पनि पाइएको छैन । कैयन् सहभागी मास्क बिना नै सहभागी भएको देखिएको छ । यस्तो अवस्थाले कोरोनाको सङ्क्रमणको ग्राफ कहाँ पुग्ला भन्ने चिन्दा कतिपयमा देखिएको छ ।