९ भदौ २०८३ काठमाडौं – नयाँ बानेश्वर चोकमा ड्युटीमा खटिएका ट्राफिक प्रहरीमाथि हातपात गर्ने एक युवक पक्राउ परेका छन्। पक्राउ पर्नेमा जुम्ला घर भएका २७ वर्षीय राज कठायत रहेका छन्।

उनलाई नियन्त्रणमा लिएर प्रहरी वृत्त नयाँ बानेश्वरमा राखी अनुसन्धान सुरु गरिएको काठमाडौं उपत्यका ट्राफिक प्रहरी कार्यालयका एसपी नरेशराज सुवेदीले जानकारी दिए।

सडक सचेतना अभियानअन्तर्गत जथाभावी बाटो काट्नेलाई आकाशे पुल प्रयोग गर्न आग्रह गर्ने क्रममा कठायतले ड्युटीमा खटिएका महिला तथा पुरुष ट्राफिक प्रहरीमाथि नै हातपात गरेका थिए।

घटनामा संलग्न युवकलाई पक्राउ गरी आवश्यक अनुसन्धान अघि बढाइएको प्रहरीले जनाएको छ। घटनासँग सम्बन्धित भिडियो सामाजिक सञ्जालमा समेत भाइरल भइरहेको छ।