कैलालीमा मोबाइल, इमेल र सामाजिक सञ्जालको बढ्दो प्रयोगका बीच पनि हुलाक सेवाको प्रयोग उल्लेख्य रहेको छ। आर्थिक वर्ष २०८२/८३ मा हुलाक निर्देशनालयमार्फत एक लाख २७ हजार ६२० चिठीपत्र तथा हुलाक सामग्री आयात–निर्यात भएका छन्, जसमा सबैभन्दा बढी ५२ हजार ६९९ रजिष्ट्री चिठी रहेका छन्।

निर्देशनालयका अनुसार वर्षभर २,७२३ ईएमएस सामग्री आदानप्रदान भएका छन् भने ४७० अन्तर्राष्ट्रिय पत्र सेवा प्रदान गरिएको छ। साथै २१ अनलाइन सञ्चार माध्यम, ३७ प्रेस प्रतिनिधि परिचयपत्र र १५ एफएम रेडियोको इजाजत तथा लाइसेन्स नवीकरण गरिएको छ। टिकट बिक्री तथा अन्य शीर्षकबाट रु ६४ लाख ३१ हजार ९०३ राजस्व सङ्कलन भएको निर्देशनालयले जनाएको छ।