७ साउन २०८३ काठमाडौं- देशभर फैलिएको बर्डफ्लु संक्रमण नियन्त्रणमा आएको पशु सेवा विभागले जनाएको छ। विभागका अनुसार साउन १ गतेयता देशका कुनै पनि स्थानमा नयाँ संक्रमण पुष्टि भएको छैन।

पछिल्लो पटक काठमाडौंको गोकर्णेश्वर–१ सुन्दरीजलमा संक्रमण देखिएपछि नयाँ केस नआएको र जोखिम घटाउन प्रभावित क्षेत्र आसपासबाट नमुना संकलन गरी परीक्षण जारी राखिएको विभागले जनाएको छ।

बर्डफ्लु नियन्त्रणका क्रममा सरकारले देशभर ८ लाख ३५ हजार ५६३ वटा पन्छी, ११ लाख ६५ हजार ६६३ वटा अण्डा र २ लाख ४५ हजार किलो दाना नष्ट गरेको छ। प्रभावित किसान तथा फर्मलाई हालसम्म करिब ५० करोड ७१ लाख रुपैयाँ क्षतिपूर्ति वितरण गरिएको छ।

विभागका अनुसार संक्रमण नियन्त्रणमा आएसँगै कुखुराको मासु र अण्डाको बजार पुनः सामान्य अवस्थामा फर्किन थालेको छ।