१७ असार २०८३ काठमाडौं – राष्ट्रिय स्वतन्त्र पार्टी (रास्वपा) का पहिलो महाधिवेशनबाट निर्वाचित पदाधिकारी र केन्द्रीय सदस्यहरूको शपथ ग्रहण कार्यक्रम आज (बुधबार) आयोजना हुँदैछ। पार्टीका महामन्त्री विपिन आचार्यका अनुसार बिहान ११ बजे काठमाडौंको घण्टीघरस्थित पार्टी केन्द्रीय कार्यालयमा ६ पदाधिकारी र ९९ केन्द्रीय सदस्यलाई शपथ गराइनेछ।

शपथ ग्रहणपछि केन्द्रीय समिति बैठक बस्ने तयारी गरिएको छ। बैठकमा मनोनीत पदाधिकारी तथा केन्द्रीय सदस्यहरूको नियुक्तिसम्बन्धी विषयमा छलफल हुने जनाइएको छ।

रास्वपाको पहिलो महाधिवेशन गत असार ७ देखि १२ गतेसम्म चितवनको भरतपुरमा सम्पन्न भएको थियो। महाधिवेशनले पार्टी सभापतिमा रवि लामिछानेलाई निर्विरोध निर्वाचित गरेको थियो। सभापति लामिछानेले भने महाधिवेशनकै क्रममा भरतपुरमा शपथ ग्रहण गरिसकेका छन्।