९ जेठ २०८३ काठमाडौं – काठमाडौं उपत्यकाबाट बाहिरिने लामो दूरीका सार्वजनिक सवारी साधनमा अब यात्रुको लगेज ट्याग प्रणाली लागू गरिने भएको छ । यात्रुको झोला हराउने, साटिने तथा चोरी हुने समस्या रोक्न नयाँ व्यवस्था लागू गर्न लागिएको हो ।

शुक्रबार काठमाडौँ उपत्यका ट्राफिक प्रहरी कार्यालय र राष्ट्रिय यातायात व्यवसायी महासङ्घबीच सम्झौता भएपछि जेठ १५ गतेदेखि उक्त प्रणाली कार्यान्वयनमा आउने भएको हो । सम्झौताअनुसार बसमा राखिने प्रत्येक लगेजमा विशेष ट्याग लगाइनेछ । यात्रुले पाउने ट्याग नम्बर र बसमा राखिएको सामानको नम्बर मिलाएर मात्रै गन्तव्यमा सामान बुझाइने व्यवस्था गरिनेछ ।

काठमाडौँ उपत्यका ट्राफिक प्रहरी कार्यालयका प्रमुख प्रहरी वरिष्ठ उपरीक्षक नवराज अधिकारी ले यात्रुको सुरक्षालाई प्राथमिकतामा राख्दै लगेज चोरी, झोला हराउने तथा गैरकानुनी गतिविधि नियन्त्रण गर्न यो प्रणाली प्रभावकारी हुने बताए ।

यस्तै राष्ट्रिय यातायात व्यवसायी महासङ्घका अध्यक्ष सरोज सिटौला ले हवाई यात्रामा जस्तै अब सार्वजनिक बस सेवामा पनि आधुनिक व्यवस्थापन प्रणाली लागू गर्न लागिएको जानकारी दिए ।

यातायात व्यवसायीका अनुसार विशेषगरी चाडपर्व, रात्रीकालीन तथा भीडभाड हुने समयमा यात्रुको सामान हराउने गुनासो बढ्दै आएको थियो । नयाँ प्रणाली लागू भएपछि यात्रुले अझ सुरक्षित र ढुक्क भएर यात्रा गर्न सक्ने विश्वास गरिएको छ ।