१४ चैत,२०८२ काठमाडौं – नेकपा एमालेका नेता गोकुल बास्कोटाले बालेन्द्र शाह (बालेन) नेतृत्वको सरकारले अपनाएको मोडल नेपाली समाजले स्वीकार नगर्ने बताएका छन्।

सरकार बनेको २४ घण्टा नबित्दै विकसित राजनीतिक घटनाक्रमबारे सामाजिक सञ्जालमा प्रतिक्रिया दिँदै उनले नेपाली समाज प्रतिशोधको राजनीतिलाई नरुचाउने दाबी गरेका हुन्। उनले पाकिस्तान र बंगलादेशको जस्तो मोडल नेपालमा लागू गर्न खोजिए पनि त्यसलाई समाजले अस्वीकार गर्ने बताएका छन्।

बास्कोटाले लेखेका छन्, ‘बालेन युगमा जान्छ भन्थे– ब्याकहोलतिर जाने देखियो। पार्ट टु भनौँ होला। पार्ट थ्री कति समयमा पुग्ने हो ? पाकिस्तानी र बंगलादेशी मोडल नेपाली समाजले स्वीकार गर्दैन।’ उनले पूर्वाग्रह र प्रतिशोधको राजनीति अन्ततः राम्रो नहुने टिप्पणी गरेका छन्।