२१ माघ,२०८२ काठमाडौं – फागुन २१ मा हुने प्रतिनिधि सभा निर्वाचनका लागि आजदेखि नेपाली सेना परिचालन गरिएको छ। निर्वाचन पूर्वको एकीकृत सुरक्षा योजनाअनुसार देशभर ७९ हजार ७२७ जना सेना खटाइएको नेपाली सेनाले जनाएको छ।

सेनाले संवेदनशील क्षेत्र तथा मतदानस्थलको अवस्थाअनुसार गस्ती गर्नेछ भने नेपाल प्रहरी र सशस्त्र प्रहरीसँग समन्वयमा तेस्रो घेरामा रहेर सुरक्षा प्रदान गर्नेछ। निर्वाचन अवधिमा विकट र अतिसंवेदनशील क्षेत्रमा हवाई गस्तीका लागि पाँच स्थानमा हेलिकप्टर ‘स्टान्डबाई’ राखिएको छ।

त्यस्तै, मतपेटिका र मतपत्र ढुवानीका लागि समेत हेलिकप्टर प्रयोग गरिनेछ। सम्भावित बम विस्फोटको जोखिमलाई ध्यानमा राख्दै बम डिस्पोजल टोली पनि तैनाथ गरिएको छ। यस अवधिमा विमानस्थल, कारागार र महत्वपूर्ण प्रतिष्ठानको सुरक्षा जिम्मा नेपाली सेनालाई दिइएको छ।