१४ माघ,२०८२ काठमाडौं – नेपाल इन्भेष्टमेण्ट मेगा बैंकले चालु आर्थिक वर्षको दोस्रो त्रैमासिक वित्तीय विवरण सार्वजनिक गरेको छ । यस अवधिमा बैंकले १ अर्ब ६१ करोड ३० लाख रुपैयाँ नाफा आर्जन गरेको छ, जुन गत वर्षको सोही अवधिको तुलनामा ४३.०४ प्रतिशतले कम हो ।

गत आवको दोस्रो त्रैमासमा बैंकले २ अर्ब ८३ करोड २३ लाख रुपैयाँ नाफा कमाएको थियो । खुद ब्याज आम्दानी १२.८३ प्रतिशतले घटेर ६ अर्ब ४२ करोड रुपैयाँमा सीमित भएको छ भने सञ्चालन नाफा पनि घटेर २ अर्ब ४० करोड रुपैयाँमा झरेको छ ।

बैंकको प्रतिसेयर आम्दानी १६.६० रुपैयाँबाट घटेर ९.४५ रुपैयाँ पुगेको छ । प्रतिसेयर नेटवर्थ १९४.७७ रुपैयाँ रहेको छ भने खराब कर्जा ५.८६ प्रतिशतबाट बढेर ७.९० प्रतिशत पुगेको छ ।

३४ अर्ब १२ करोड रुपैयाँ चुक्ता पुँजी रहेको बैंकले ५ खर्ब १९ अर्ब रुपैयाँ निक्षेप संकलन गरी ३ खर्ब २८ अर्ब रुपैयाँ कर्जा लगानी गरेको छ ।