मंसिर २९,२०८२ काठमाडौं— सरकारले दुर्गा प्रसाईं नेतृत्वको ‘राष्ट्र, राष्ट्रियता, धर्म, संस्कृति र नागरिक बचाउ महाअभियान’सँग वार्ता गर्न समिति गठन गरेको छ। आज प्रधानमन्त्रीको सचिवालयले महाअभियानसँग संवाद अघि बढाउने उद्देश्यसहित समिति गठन गरेको हो।

महाअभियानले उठाएका मागहरूमध्ये तत्काल सम्बोधन गर्न सकिने विषयमा छलफल गरी समाधान निकाल्न सञ्चार तथा सूचना प्रविधि मन्त्री जगदीश खरेलको संयोजकत्वमा समिति बनाइएको छ।

समितिमा अजयभद्र खनाल प्रमुख सल्लाहकार तथा गोविन्द नारायण तिमिल्सिना जनसम्पर्क सल्लाहकार रहेका छन्। साथै, समितिमा सरकार पक्षका प्रतिनिधिसँगै महाअभियानतर्फबाट तीन जना प्रतिनिधि सिफारिस गरी पठाउन अनुरोध गरिएको छ।

समितिले दुवै पक्षबीच वार्ता गरी मागहरू समाधानतर्फ पहल गर्ने सरकारको अपेक्षा रहेको छ।