मंसिर २२, २०८२ काठमाडौं— जेनजी आन्दोलनका क्रममा भएको दमन र भोलिपल्टका विध्वंसबारे छानबिन गर्न बनेको जाँचबुझ आयोगले आजदेखि सशस्त्र प्रहरी बलका महानिरीक्षक (आईजी) राजु अर्यालसँग बयान लिन थालेको छ।

आयोगसम्बद्ध स्रोतका अनुसार अर्यालसँगको बयानपछि नेपाल प्रहरीका तत्कालीन एआईजी तथा हालका प्रहरी महानिरीक्षक दानबहादुर कार्कीलाई पनि आयोगले बोलाउने तयारी छ। कार्की आन्दोलनकै भोलिपल्ट काठमाडौं उपत्यका प्रहरी कार्यालयको कमाण्ड सम्हालेका थिए।

यसअघि आयोगले तत्कालीन प्रमुख जिल्ला अधिकारी छवि रिजाल र तत्कालीन प्रहरी महानिरीक्षक चन्द्रकुबेर खापुङका बयान गरिसकेको छ। समयावधि सकिन अब एक सातामात्र बाँकी छ । आयोगले बाँकी बयान, विवरण संकलन र प्रतिवेदन लेखनका कारण म्याद थप्नुपर्ने अवस्था देखिएको स्रोतले जानकारी दियो।