पूर्वराष्ट्रपति विद्यादेवी भण्डारी र अन्तरिम सरकारकी प्रधानमन्त्री सुशीला कार्कीबीच आइतबार सिंहदरबारमा भेटवार्ता भएको छ। जेन–जी आन्दोलनका क्रममा भएको व्यापक आगजनीपछि क्षतिग्रस्त संरचनाको अवलोकन गर्न सिंहदरबार पुगेकी पूर्वराष्ट्रपति भण्डारीले प्रधानमन्त्री कार्कीसँग समेत भेट गरेकी हुन्।

भदौ २३ र २४ गतेको आन्दोलनमा प्रदर्शनकारीले सिंहदरबारका विभिन्न मन्त्रालय, सवारीसाधन तथा अन्य संरचनामा आगजनी गरेका थिए। हाल आगजनीबाट क्षतिग्रस्त संरचनाको पुनर्निर्माण कार्य जारी रहेको छ।

जेन–जी आन्दोलनकै क्रममा भण्डारीको निजी निवासमा समेत आगजनी भएकाले घटनापछि उनी सार्वजनिक रूपमा सक्रिय देखिएकी थिइनन्। आन्दोलनपछि गठन भएको अन्तरिम सरकार नेतृत्व गरिरहेकी प्रधानमन्त्री कार्की र पूर्वराष्ट्रपति भण्डारीबीच आन्दोलनपछिको यो पहिलो भेटवार्ता रहेको बताइएको छ।