मंसिर ७, २०८२ काठमाडौं – टोखा नगरपालिका–९ नयाँ बसपार्क नजिकै शनिबार दिउँसो फेला परेको शव तेस्रो लिंगीको भएको खुलेको छ। तर शवको पहिचान नहुँदा प्रहरीले अनुसन्धानमा चुनौती महसुस गरेको छ। जिल्ला प्रहरी परिसर काठमाडौंका एसपी तथा प्रवक्ता पवनकुमार भट्टराईका अनुसार शव तन्नाले बेरिएको अवस्थामा सडक किनारमा भेटिएको थियो। सूचना पाएपछि प्रहरी घटनास्थलमा पुगेर मुचुल्का उठाई अनुसन्धान सुरु गरेको हो।

शव शंकास्पद अवस्थामा भेटिएकाले हत्याको आशंकामा प्रहरीले अनुसन्धान अघि बढाएको छ। शव हतियारले काटिएको वा टुक्रा पारेको भने नभएको, सिंगो अवस्थामा भेटिएको प्रहरीले बताएको छ। पोष्टमार्टमका लागि शव त्रिवि शिक्षण अस्पताल पठाइएको छ। तर अहिलेसम्म मृतकको सनाखत हुन सकेको छैन।