कात्तिक २३, २०८२ काठमाडौं— जल तथा मौसम विज्ञान विभागका अनुसार हाल देशभर कुनै उल्लेखनीय मौसम प्रणालीको प्रभाव छैन। विभागले दिएको जानकारीअनुसार कोशी, गण्डकी र कर्णाली प्रदेशका पहाडी तथा हिमाली भू–भागमा आंशिक बदली रही बाँकी भू–भागमा मौसम मुख्यतया सफा रहेको छ।

दिउँसो कोशी प्रदेश, बागमती प्रदेश र गण्डकी प्रदेशका पहाडी भू–भागमा आंशिक बदली रहनेछ भने अन्य स्थानमा मौसम सामान्य रूपमा सफा रहने विभागले जनाएको छ। साथै, कोशी र गण्डकी प्रदेशका हिमाली भू–भागका एक–दुई स्थानमा हल्का वर्षा वा हिमपात हुन सक्ने सम्भावना रहेको बताइएको छ।

यस्तै, आज राति पनि कोशी र गण्डकी प्रदेशका पहाडी भू–भागमा आंशिक बदली रहनेछ भने बाँकी भू–भागमा मौसम मुख्यतया सफा रहने विभागले जानकारी दिएको छ।

विभागले आगामी केही दिनसम्म मौसम स्थिर रहने अनुमान गर्दै यात्रुहरू र कृषकहरूलाई नियमित मौसम सूचनामा ध्यान दिन आग्रह गरेको छ।