असोज २७,२०८२ काठमाडौं– पछिल्लो साता नेपालभर डेंगु संक्रमितको संख्या तीव्र रूपमा बढ्दै ४१३ जना पुगेको छ। हालसम्म देशभर ५,८७४ जनामा डेंगु पुष्टि भएको छ। ७५ जिल्लामा संक्रमण फैलिँदा ४ जनाको मृत्यु भइसकेको छ।

इपिडिमियोलोजी तथा रोग नियन्त्रण महाशाखाका अनुसार गण्डकी प्रदेशमा सबैभन्दा धेरै १५१ जना नयाँ संक्रमित भेटिएका छन्। बागमतीमा १०७, कर्णालीमा ६४, लुम्बिनीमा ३९, सुदूरपश्चिममा ३०, कोशीमा १६ र मधेशमा ६ जनामा संक्रमण देखिएको छ।

जनस्वास्थ्यविद्का अनुसार अस्थिर तापक्रम, अव्यवस्थित शहरीकरण र जमेको पानीका कारण लामखुट्टे बढ्न थालेको हो। डेंगुबाट बच्न लामखुट्टेको टोकाइबाट जोगिने र लार्भा नष्ट गर्ने उपायलाई सबैभन्दा प्रभावकारी मानिन्छ।