असोज २२, २०८२ काठमाडौं– पूर्वसभामुख अग्निप्रसाद सापकोटाले संघीय संसद् सचिवालयले उपलब्ध गराएको सरकारी सवारी साधन फिर्ता गरेका छन्। संसद् सचिवालयका प्रवक्ता सहसचिव एकराम गिरीका अनुसार सापकोटाले बुधबार गाडी फिर्ता गरेका हुन्। उनलाई मन्त्रिपरिषद्को निर्णयअनुसार सचिवालयमार्फत सरकारी गाडी दिइएको थियो।

पूर्वप्रधानन्यायाधीश सुशीला कार्की नेतृत्वको सरकारले पूर्व पदाधिकारीलाई दिइएका सवारी सुविधाहरू खारेज गर्ने निर्णय गर्दै गाडी फिर्ता गर्न आग्रह गरेको थियो।

त्यस निर्णयपछि सापकोटाले आफूलाई दिइएको गाडी दशैंपछि फिर्ता गर्ने जानकारी सचिवालयलाई गराएका थिए। सोही बमोजिम बुधबार उनले प्रयोगमा रहेको गाडी फिर्ता गरिएको प्रवक्ता गिरीले जानकारी दिए।