भदौ २२,२०८२ काठमाडौं – नेपाली कांग्रेसले कानुन नबनाइएसम्म सामाजिक सञ्जाल बन्द गर्न नहुने निष्कर्ष निकालेको छ । आइतबार पार्टी सभापति शेरबहादुर देउवा निवास बुढानीलकण्ठमा बसेको केन्द्रीय कार्यसम्पादन समितिको बैठकले सर्वोच्च अदालतको आदेशअनुसार कानुन नबनाउँदासम्म दर्ता नभएका सामाजिक सञ्जाल बन्द नगर्नुपर्ने निर्णय गरेको हो ।

बैठकमा सरकारले यस विषयमा लिएको पोजिसन बुझेर आवश्यक कदम चाल्ने सहमति पनि भएको कांग्रेस नेताहरूले बताएका छन् । सरकारले गत बिहीबारदेखि नेपालमा दर्ता नभएका २६ सामाजिक सञ्जाल बन्द गर्ने निर्णय गरेपछि चौतर्फी आलोचना भएको छ । तर कांग्रेसले यसबारे आधिकारिक धारणा सार्वजनिक गरेको थिएन ।

यसअघि कांग्रेस महामन्त्री गगन थापाले तत्काल प्रतिक्रिया दिँदै सरकार “उल्टो बाटो हिडेको” आरोप लगाएका थिए ।