भदौ १६,२०८२ काठमाडौं – चीनको तियानजिनमा सम्पन्न सांघाई सहयोग संगठन (एससीओ) सम्मेलनपछि भारतीय प्रधानमन्त्री नरेन्द्र मोदीले रुसी राष्ट्रपति भ्लादिमिर पुटिनसँग द्विपक्षीय भेटवार्ता गरेका छन् ।

भेटवार्तामा दुवै नेताबीच व्यापार, मल, अन्तरिक्ष, सुरक्षा र संस्कृति लगायतका क्षेत्रमा सहयोगलाई थप सुदृढ पार्नेबारे छलफल भएको मोदीले जानकारी दिएका छन् । उनले भने, “हामीले युक्रेन द्वन्द्वको शान्तिपूर्ण समाधानमा वार्ता गर्यौं, साथै क्षेत्रीय र विश्वव्यापी मुद्दामा विचार साझा गर्यौं ।”

मोदीले भारत–रुसबीचको सम्बन्धलाई विशेष र विशेषाधिकार प्राप्त रणनीतिक साझेदारीको रुपमा वर्णन गर्दै यसलाई क्षेत्रीय तथा विश्वव्यापी स्थिरताको महत्त्वपूर्ण स्तम्भ रहेको बताए ।

सम्मेलनपछि प्रधानमन्त्री मोदी र राष्ट्रपति पुटिन एउटै कारमा बसेर द्विपक्षीय बैठक स्थलतर्फ गएका थिए ।