काठमाडौं – एलन मस्कले आफ्नो नयाँ राजनीतिक दल ‘अमेरिका पार्टी’ बनाउने घोषणा गरेका छन्। मस्कले भनेका छन्, ‘यदि राष्ट्रपति डोनाल्ड ट्रम्पको ‘वान बिग ब्युटिफुल बिल’ अमेरिकी संसदमा पारित भयो भने मैले भोलिपल्टै नयाँ राजनीतिक दलको घोषणा गर्नेछु।’

मस्कले ट्रम्पको यो विधेयकको आलोचना गरेका छन् र यसलाई ऋण र दासत्वको विधेयक भनेका छन्। हाल ट्रम्पको ‘वान बिग, ब्युटिफुल बिल’ मा सिनेटमा बहस चलिरहेको छ। यो विधेयक विश्वका सबैभन्दा धनीव्यक्तिहरुमध्ये एक ट्रम्प र मस्कबीच तनावको कारण बनेको छ।

मस्कले सामाजिक सञ्जाल प्लेटफर्म एक्समा लेखेका छन्, ‘यदि यो विधेयक पारित भयो भने सरकारी खर्च घटाउन अभियान चलाउने र इतिहासकै सबैभन्दा ठूलो ऋण वृद्धिको पक्षमा मतदान गर्ने संसदका प्रत्येक सदस्यलाई लज्जित हुनुपर्छ। मलाई लाग्छ यो विधेयक पारित भएपछि देशमा नयाँ राजनीतिक दलको आवश्यकता पर्नेछ। बिग ब्युटिफुल बिललाई समर्थन गर्ने नेताहरुले अर्को वर्ष हुने प्राथमिक चुनाव हार्नेछन्।’

मस्कले सामाजिक सञ्जालमा भने, ‘यदि यो हास्यास्पद विधेयक पारित भयो भने अमेरिका पार्टी भोलिपल्टै गठन हुनेछ। हाम्रो देशलाई डेमोक्रेटिक र रिपब्लिकन पार्टीहरुको विकल्प चाहिन्छ ता कि जनताको आवाज सुन्न सकियोस्।’

सिनेटले जुलाई ४ को समयसीमाअघि नै ‘वान बिग, ब्युटिफुल बिल’ पारित गर्ने प्रयास गरिरहेको छ। यो विधेयक ट्रम्पको अजेन्डाको एउटा महत्वपूर्ण भाग हो।

मस्कले ट्रम्पलाई चुनावी अभियानमा धेरै मद्दत गरेका थिए। मस्कलाई हरेक कार्यक्रममा ट्रम्पसँगै देखिन्थ्यो। चुनाव जितेपछि मस्कलाई ट्रम्प प्रशासनमा दक्षता विभागको नेतृत्व गर्न छनोट गरिएको थियो। तर, केही महिनाभित्रै दुईजनाबीचको सम्बन्धमा दरार आयो। ‘वान बिग, ब्युटिफुल बिल’लाई लिएर दुवैबीचको विवाद अब अमेरिकामा मात्र नभई विश्वको अगाडि खुलेआम बाहिर आएको छ।

‘वन बिग, ब्युटिफुल बिल’ कर कटौती, सेनाको बजेट बढाउने र अवैध आप्रवासीको ठूलो मात्रामा देश निकालाका लागि खर्च बढाउनेसँग सम्बन्धित छ। खर्चमा भएको यो वृद्धिले स्वास्थ्य र शिक्षाजस्ता देशका क्षेत्रमा असर पार्ने सम्भावना छ। मस्कले सुरुदेखि नै यो विधेयकको विरोध गर्दै आएका छन्। अर्कोतर्फ ट्रम्पले यो विधेयकलाई कुनै पनि मूल्यमा कानून बनाउन चाहन्छन्।

यो विधेयकमार्फत ट्रम्प सन् २०१७ मा आफ्नो पहिलो कार्यकालमा लागू गरिएको कर कटौतीलाई थप विस्तार गर्न चाहन्छन्। यस विधेयकमा ४।५ ट्रिलियन डलर खर्च गर्ने प्रावधान छ। मस्क र विधेयकका आलोचकहरु भन्छन्, ‘यसले अमेरिकाको राष्ट्रिय ऋण ३।३ ट्रिलियन डलरमा बढाउनेछ। यसका लागि स्वास्थ्य सेवा बजेटमा ठूलो कटौती आवश्यक पर्नेछ।’

–एजेन्सी