असार १९, २०८२ काठमाडौं ।  केही दिनअघि मात्र बढाइएको अन्डाको मूल्य फेरि वृद्धि गरिएको छ। नेपाल लेयर्स कुखुरापालक संघले शुक्रबार (असार २०) देखि लागू हुने गरी अन्डाको मूल्य पुनः बढाउने निर्णय गरेको हो।

संघले ठूलो अन्डाको मूल्य प्रति क्रेट १५ रुपैयाँले बढाउँदै नयाँ दर ४९५ रुपैयाँ निर्धारण गरेको छ। यस्तै, मिडियम अन्डाको मूल्य प्रति क्रेट ४६५ रुपैयाँ तोकिएको छ।

संघका सचिव मदन पोखरेलका अनुसार हाल अन्डाको उत्पादनमा गिरावट आएको छ भने माग उच्च छ, जसका कारण मूल्य समायोजन गर्नुपरेको हो।

यसअघि करिब १० दिनअघि मात्र अन्डाको मूल्यमा वृद्धि गरिएको थियो। लगातारको मूल्यवृद्धिले उपभोक्ताको भान्सामा थप भार पर्ने देखिएको छ।