असार ६, २०८२ काठमाडौं । चालु आर्थिक वर्ष २०८०/८१ को जेठ महिनामा वाणिज्य बैंकहरूको कर्जा लगानीमा सामान्य सुधार देखिएको छ। पछिल्ला केही महिनामा सुस्त रहेको कर्जा प्रवाहमा यो महिना सुधार देखिएको नेपाल बैंकर्स संघको तथ्यांकले देखाएको हो।

वाणिज्य बैंकहरुले जेठ महिनामा मात्र ३६ अर्ब कर्जा लगानी गरेका छन् । वैशाखमा ४ अर्ब रुपैयाँ घटेको कर्जा विस्तार जेठमा केही बढेको हो । त्यस्तै, वैशाखसम्ममा वाणिज्य बैंकहरूको कर्जा लगानी ४९ खर्ब ११ अर्ब रुपैयाँ थियो । जेठ मसान्तसम्म आउँदा ४९ खर्ब ४७ अर्ब पुगेको छ । तथ्यांकअनुसार जेठमा मात्र ३६ अर्ब रुपैयाँ कर्जा लगानी बढेको देखिन्छ ।

गत चैतसम्ममा वाणिज्य बैंकहरुले ४९ खर्ब १५ अर्ब कर्जा लगानी गरेका थिए । वैशाखमा ४ अर्ब घटेर ४९ खर्ब ११ अर्ब रुपैयाँमा झरेको थियो । जेठमा भने ३६ अर्ब बढ्न पुगेको हो । यो वर्ष सबैभन्दा बढी कर्जा लगानी पुसमा भएको थियो । पुसमा ९४ अर्ब रुपैयाँ कर्जा लगानी भएकोमा त्यसपछि फेरि घटेको बैंकर्स संघको तथ्यांक छ ।पुसमा ९४ अर्ब कर्जा लगानी भए पनि चैतमा वाणिज्य बैंकहरूले ६५ अर्ब लगानी गरेका थिए । यसपछि गत भदौमा ५६ अर्ब कर्जा लगानी भएकोमा साउनमा ५३ अर्बमा झरेको थियो ।

यस्तै, मंसिरमा ४२ अर्ब ऋण विस्तार भएकोमा त्यसपछि सोभन्दा कम कर्जा विस्तार भएको छ । गत असारको तुलनामा साउनमा २ अर्ब कर्जा विस्तार बढेको थियो । २०८१ असारमा ४५ खर्ब ७१ अर्ब पुगेको वाणिज्य बैंकहरूको कर्जा विस्तार साउनमा २ अर्ब बढेको थियो भने कात्तिकमा २ अर्ब घटेको थियो ।

बैंकहरूले २०८१ असारदेखि २०८२ जेठसम्ममा ३ खर्ब ७७ अर्ब रुपैयाँ कर्जा विस्तार गरेका छन् । गत आवको भन्दा अहिले कर्जा केही बढ्दै गएको तथ्यांकले देखाएको हो । यद्यपि, यो वृद्धि पर्याप्त वा अपेक्षित गतिको भने होइन । बैंकरहरूका अनुसार अहिले सुस्त गतिमै भए पनि कर्जा बढेको देखिएको छ ।

राष्ट्र बैंकले पनि निर्माण क्षेत्रको कर्जा विस्तार अन्यको भन्दा राम्रो देखाएको छ । चालु आर्थिक वर्षको साउनदेखि वैशाखसम्ममा बैंक तथा वित्तीय संस्थाले निजी क्षेत्रमा प्रवाहित कर्जा ७.३ प्रतिशतले बढाएको राष्ट्र बैंकको तथ्यांक छ । यसमा निर्माण क्षेत्रमा मात्रै १२.३ प्रतिशतले कर्जा प्रवाह बढेको छ । राष्ट्र बैंकका अनुसार यो क्षेत्रमा प्रवाहित कर्जा वैशाख मसान्तसम्ममा २ खर्ब ३३ अर्ब ४५ करोड रुपैयाँ पुगेको छ ।