काठमाडौं । सरकारले गैरआवासीय नेपाली नागरिकता सम्बन्धी विधेयकको मस्यौदा तयार पारेको छ। गृहमन्त्री रमेश लेखकले शुक्रबार प्रतिनिधिसभा अन्तर्गतको राज्य व्यवस्था तथा सुशासन समितिमा उक्त जानकारी दिएका हुन्।

गृहमन्त्री लेखकका अनुसार गैरआवासीय नेपाली नागरिकता प्रदान गर्ने विषयलाई विधिवत् रूपमा सम्बोधन गर्न नयाँ ऐन निर्माण प्रक्रिया अगाडि बढाइएको हो।

“गैरआवासीय नेपाली नागरिकता दिँदा राजनीतिक अधिकार बाहेक आर्थिक, सामाजिक, सांस्कृतिक अधिकार समेट्ने गरी संविधानको भावना अनुरूप विधेयकको मस्यौदा तयार भएको छ,” गृहमन्त्री लेखकले बताए।

उनका अनुसार अब सो विधेयक कानुनी प्रक्रियाबाट अघि बढाइनेछ। गैरआवासीय नेपालीहरुले लामो समयदेखि नागरिकताको स्पष्ट व्यवस्थाका लागि माग गर्दै आएका थिए।