काठमाडौं । संसद् बैठकमा देखिएको गतिरोध अन्त्य गर्ने प्रयासस्वरूप प्रमुख तीन दलका शीर्ष नेताहरूबीच आज छलफल हुन लागेको छ। प्रधानमन्त्रीको सचिवालयका अनुसार प्रधानमन्त्री केपी शर्मा ओली, नेपाली कांग्रेसका सभापति शेरबहादुर देउवा र माओवादी केन्द्रका अध्यक्ष पुष्पकमल दाहाल ‘प्रचण्ड’ बीच सोमबार अपरान्ह छलफल हुने तय भएको हो।

छलफल प्रधानमन्त्री तथा मन्त्रिपरिषद् कार्यालय, सिंहदरबारमा हुने प्रधानमन्त्रीको सचिवालयले जनाएको छ।

हाल संसद् बैठक बारम्बार अवरुद्ध हुँदै आएको छ। प्रमुख विपक्षी दलको अवरोध र सत्ता पक्षको अडानका कारण संसद् गतिशील बन्न सकेको छैन। यसै सन्दर्भमा तीन प्रमुख नेताहरूबीचको आजको वार्ता निकै महत्वपूर्ण हुने अनुमान गरिएको छ।

स्रोतका अनुसार, नेताहरूले संसद् सुचारु गर्ने उपाय, आपसी सहकार्य, र समसामयिक राजनीतिक घटनाक्रमबारे गहन छलफल गर्नेछन्।