काठमाडौं । सार्वजनिक यातायात बन्द गर्दै आन्दोलनमा उत्रिएका यातायात व्यवसायीका माग सम्बोधन गर्न सरकार र व्यवसायीबीच वार्ता टोली गठन गर्ने सहमति जुटेको छ।

गृहमन्त्री रमेश लेखक र नेपाल यातायात व्यवसायी राष्ट्रिय महासंघका प्रतिनिधिहरूबीच सोमबार भएको छलफलपछि समस्या समाधानका लागि वार्ता समिति गठन गर्ने सहमति भएको महासंघका अध्यक्ष विजयबहादुर स्वाँरले जानकारी दिए।

उनका अनुसार वार्ता टोलीमा व्यवसायी पक्षबाट चार जना र सरकार पक्षबाट सात जना सदस्य रहनेछन्। भौतिक पूर्वाधार तथा यातायात मन्त्रालयको संयोजकत्वमा टोलीले वार्तालाई अगाडि बढाउनेछ।

स्वाँरले आज दिनभर छलफल गरी निष्कर्षमा पुग्ने प्रयास भइरहेको जनाउँदै प्रदेश सरकारका निर्णयहरू स्थगन गरिनुपर्ने र व्यवसायीहरूले आन्दोलन फिर्ता लिन सक्ने वातावरण बनाउने दिशामा छलफल भइरहेको बताए।