४ वैशाख २०८०, चितवन : राष्ट्रिय स्वतन्त्र पार्टी(रास्वपा)का सभापति रवि लामिछानेका सवारी चालक घरको तीन तला माथिबाट खसेको अवस्थामा फेला परेका छन् । सिन्धुपाल्चोकको बाह्रबिसे नगरपालिका- ३ घर भएका ३९ वर्षीय शम्भु भन्ने दिलबहादुर थापा चितवनको भरतपुरस्थित एक घरको तीन तला माथिबाट तल खसेको अवस्थामा फेला परेका हुन्।

चितवन निर्वाचन क्षेत्र नम्बर – २ मा यही वैशाख १० गते हुने उपनिर्वाचनको उम्मेदवार लामिछानेको सवारी चालक थापा भरतपुरस्थित एक घरको छतबाट आज बिहान करिब ४ बजेको समयमा खसेको अवस्थामा फेला परेका हुन् । चितवनका प्रहरी उपरीक्षक रामेश्वर कार्कीकाअनुसार सीसीटिभी फुटेजमा बिहान ३ बजेर ५४ मिनेट जाँदा चालक थापा छतबाट खसेको देखिएको छ ।

छतबाट खसी गम्भीर घाइते थापाको टाउको र खुट्टामा चोट लागेको छ । उनको भरतपुरस्थित कलेज अफ मेडिकल साइन्सेसमा उपचार भैरहेको प्रहरीले जनाएको छ ।

स्रोतका अनुरसार उनी रास्वपाका महामन्त्री मुकुल ढकालका चालकसँगै राति छतमा सुतेका थिए ।