२४ असोज २०७९, एजेन्सी : पाँच गोलको रोमाञ्चक खेलमा लिभरपुललाई हराउँदै आर्सनल पुनः प्रिमियर लिगको शीर्ष स्थानमा उक्लेको छ । आइतबार भएको खेलमा आर्सनल आफ्नो घरेलु मैदानमा ३-२ गोलले विजयी बनेको हो । खेलको पहिलो मिनेटमा नै ग्याब्रिएल मार्टिनेलीले आर्सनललाई अग्रता दिलाएका थिए ।

तर डार्विन नुनेजले ३४ औँ मिनेटमा गोल गर्दै खेल बराबरी गरे । पहिलो हाफको इन्जुरी समयमा बुकायो साकाले गोल गर्दै आर्सनललाई पुनः अग्रता दिलाए । तर, आर्सनलको अग्रता लामो समय टिकेन । दोस्रो हाफको सुरुवातमा नै रोबर्टो फर्मिन्होले गोल गर्दै खेलमा लिभरपुललाई फर्काए ।

खेलका ७६ औँ मिनेटमा थियागोले ग्याब्रियल जिसुसलाई फल हानेपछि आर्सनलले पेनाल्टी पायो । जसलाई साकाले गोलमा परिणत गर्दै टोलीलाई जीत दिलाए । ९ खेलपछि २४ अंक बटुल्दै आर्सनल लिगको शीर्ष स्थानमा रहेको छ । लिभरपुल १० अंकसहित लिगको १० औँ स्थानमा सीमित बनेको छ ।