१३ वैशाख २०७८, काठमाडौँ : शिवपुरी राष्ट्रिय निकुञ्जमा डढेलो लागेको छ । डढेलो नियन्त्रणका लागि हेलिकप्टररबाट समेत पानी हानिएको छ । तर नियन्त्रणमा नआएको काठमाडौं प्रहरी परिसर, टेकुका एसपी दिनेशराज मैनालीले बताए । बुढानिलकण्ठबाट पूर्वतिर तारेभिरको जंगलमा दिउँसो २ बजेदेखि आगलागी भएको भन्दै प्रहरी कहाँ खबर पुगेको थियो ।

‘त्यसपछि नेपाली सेना, वनको टोली परिचालन गरेर नियन्त्रणमा लिने प्रयास गरिएको थियो’ एसपी मैनालीले भने, ‘अहिलेसम्म पनि आगो नियन्त्रणमा नआएपछि फायर लाइन बनाएर आगोलाई थप फैलिन नदिने प्रयास भइरहेको छ ।’ एसपी मैनालीका अनुसार अहिले साँझ परेकाले हेलिकप्टररबाट पानी हाल्न रोकिएको छ । यसअघि पनि शिवपुरीको जंगलमा आगलागी हुँदा हेलिकप्टररबाट पानी हालिएको थियो । मंगलबार एकैदिन थप दुई ठाउँमा पनि डेढलो लागेको थियो ।

प्रहरीका अनुसार म्हैपी मन्दिर नजिकैको जंगलमा लागेको आगो दुई वटा दमकल, सोह्रखुट्टे प्रहरी र स्थानीयको सहयोगमा नियन्त्रणमा लिइएको थियो । टोखामा विष्णुमति नदीको मुहानमा रहेको सामुदायिक वनमा पनि आगलागी भएको थियो । तर प्रहरी र दमकलको सहयोगमा नियन्त्रणमा लिइएको थियो । तीनवटै आगलागीको कारण खुलेको छैन ।