एजेन्सी

२६ कार्तिक, २०७८ काठमाडौँ : विकिलिक्सका संस्थापक जुलियन असान्जलाई जेलभित्रै विवाह गर्ने अनुमति मिलेको छ । जेलजीवन बिताइरहेका असान्जले आफ्नी पार्टनर स्टेल्ला मोरिससँग विवाह गर्न चाहेको भन्दै जेल प्रशासनमा निवेदन दिएका थिए ।

अविवाहित अवस्थामै यो जोडी दुई छोराका अभिभावक बनिसकेका छन् । असान्जले लण्डनस्थित इक्वेडरको दूतावासमा शरण लिएका बेला उनीहरुबीच सम्बन्ध बनेको थियो । दूतावासले शरण दिन अस्वीकार गरेपछि असान्जलाई प्रहरीले पक्राउ गरेको थियो । उनी अहिले लण्डनस्थित बेलमार्स जेलमा छन् ।

जेलका गर्भनरले असान्जको निवेदनलाई स्वभाविक रुपमा लिएको जेल प्रशासनले जनाएको छ । मोरिसले पनि यस निर्णयबाट आफुलाई न्याय मिलेको बताएकी थिइन् । ‘मलाई आशा छ, हाम्रो विवाहमा थप हस्तक्षेप हुनेछैन,’ उनले भनिन् । गत वर्ष एक अन्तर्वार्ताका क्रममा मोरिसले असान्जसँग आफु २०१५ देखि सम्बन्धमा रहेको र उनका दुई छोरा हुर्काइरहेको बताएकी थिइन् । दक्षिण अफ्रिकामा जन्मिएकी मोरिस पेशाले वकिल हुन् ।

विकिलिक्सको युट्युब एकाउन्टमा पोस्ट गरिएको भिडियोमा उनले असान्जसँग सन् २०११ मा पहिलोपटक भेट भएको बताएकी थिइन् । त्यसयता, उनी असान्जको पक्षमा कानूनी रुपमा लडेकी थिइन् । दैनिक रुपमा इक्वेडरको दूतावासमा गएर असान्जलाई भेट्ने गरेको र त्यहीक्रममा २०१५ देखि प्रेम सम्बन्ध बनेको उनले बताएकी थिइन् ।

२०१७ मा असान्जसँग इन्गेजमेन्ट गरेको खुलासा पनि उनले गरेकी थिइन् । मोरिसका अनुसार असान्जले आफ्ना दुबै छोराहरुलाई भिडियोमार्फत हेरेका थिए र त्यसको केही समयपछि उनीहरुलाई लिएर मोरिस पनि दूतावास गएकी थिइन् ।

५० वर्षीय असान्जमाथि अमेरिकाले जासूसीको आरोप लगाएको छ । र, असान्जको सुपुदर्गी गर्न बेलायतसँग माग गरिरहेको छ । त्यसैगरी स्वीडेनमा पनि उनीमाथि यौन दूराचारको मुद्दा चलिरहेको छ । र, स्वीडेनले पनि सुपुदर्गी गर्न माग गरेको छ । तर, असान्जले यी आरोप अस्विकार गरेका छन् ।

यस विषयमा असान्जले अहिले पनि कानूनी लडाँइ लडिरहेका छन् । आफ्ना राष्ट्रिय महत्वका सुचनाहरु असान्जले खुलासा गरेको अमेरिकाको आरोप छ । उनले विकिलिक्स प्रकाशनमार्फत अफगानिस्तान र ईराक युद्धसँग जोडिएका हजारौं दस्तावेजहरु लिक गरेका थिए । अप्रिल २०१० मा अमेरिकी सैनिकले इराकमा हेलिकोप्टरमार्फत सर्वसाधारणको हत्या गरिरहेको फूटेज पनि यसमा समावेश छ ।