काठमाण्डौ: अख्तियार दुरूपयोग अनुसन्धान आयोगले शुक्रबार विशेष अदालतमा लेखा अधिकृत अर्जुनप्रसाद सापकोटा र इन्जिनियर पूजा कार्कीविरूद्ध बिगो ९५ हजार कायम गरी भ्रष्टाचार मुद्दा दायर गरेको हो।

इन्जिनियर कार्कीले ठेक्का सम्झौता अनुसार काम सकाएर बिल भुक्तानी र प्राविधिक परीक्षण प्रतिवेदन तयार गर्न सेवाग्राहीसँग घुस मागेकी थिइन्। सो सूचनाको आधारमा टंगालबाट खटिएको टोलीले सेवाग्राहीबाट ९५ हजार घुस लिइसकेको अवस्थामा नियन्त्रणमा लिएको थियो।

अनुसन्धानको क्रममा लेखा अधिकृत अर्जुनप्रसाद सापकोटाको निर्देशनमा पूजाले आफ्नो र सापकोटाको लागि घुस लिएको पुष्टि भएको अख्तियारले जनाएको छ। उनीहरूमाथि जनही बिगो ९५ हजार कायम गरी जरिवाना र कैद सजायको मागदाबी गरिएको छ।