डोटी, अब सर्वसाधारणले सेनाको ‘कम्ब्याट ड्रेस’ लगाउन नपाउने भएका छन् । जिल्ला प्रशासन कार्यालय डोटीले एक परिपत्र जारी गरी डोटीका गैरसैनिक व्यक्तिलाई सैनिकले लगाउने खालका ‘कम्ब्याट ड्रेस’ लगाउन निषेध गरेको हो ।

कार्यालयले गैरसैनिकलाई ‘कम्ब्याट ड्रेस’ लगाउन निषेध गरिएकाले यसलाई कडाइका साथ लागू गर्न जिल्लाका ९ वटै स्थानीय तहका प्रमुख प्रशाकीय अधिकृतलाई निर्देशनसहितको पत्राचार गरिएको छ ।

नेपाली सेनाका सकल दर्जाले लगाउने सैनिक पोशाक स्थानीय बजारमा सहजरुपमा बिक्री वितरण हुने हुँदा गैरसैनिकले व्यक्तिले ‘फेशन’का रूपमा उक्त पोशाक प्रयोग गरेकाले यसलाई निषेध गरिएको जिल्ला प्रशासन कार्यालयले जनाएको छ । डोटीका बजारमा रहेका विभिन्न पसलमा त्यस्ता पोशाक (जुत्तासमेत) खरीद गरेको ठाउँमै फिर्ता गर्न व्यवसायीलाई समेत प्रशासनले आग्रह गरेको छ ।