२६ भदौ २०८३ काठमाडौं — सोलुखुम्बुको महाकुलुङ गाउँपालिका–गुदेलस्थित हुङ्गा (हुङ्कु) खोलामा पहिरो खसेर करिब १५ मिटरको ड्याम बनेपछि आसपासका बासिन्दालाई उच्च सतर्कता अपनाउन आग्रह गरिएको छ। जिल्ला प्रशासन कार्यालय सोलुखुम्बुका अनुसार खोलामा माथिबाट पहिरो खसेर ड्याम बनेको हो। हाल पनि थप पहिरो खसिरहेको जनाइएको छ।

बाढी पूर्वानुमान महाशाखाले हुङ्गा (हुङ्कु) खोला, दूधकोशी नदीको तटीय क्षेत्र तथा आसपासका बासिन्दालाई अर्को सूचना जारी नभएसम्म उच्च सतर्कता अपनाउन अनुरोध गरेको छ।

खोलामा बनेको ड्यामका कारण थप जोखिम हुन सक्ने भएकाले तटीय तथा आसपासका क्षेत्रमा आवश्यक सावधानी अपनाउन महाशाखाले आग्रह गरेको छ।