काठमाडौं । प्रमुख प्रतिपक्षी दल नेपाली कांग्रेसका सांसद भीष्मराज आङ्देम्बेले विपद्का बेला सरकार सामाजिक सञ्जालमै अल्झिएको आरोप लगाएका छन्। प्रतिनिधिसभाको बैठकमा पार्टीको तर्फबाट सम्बोधन गर्दै सांसद आङ्देम्बेले सरकारले पीडितको उद्धार र ज्यान जोगाउनभन्दा प्रचारमा बढी ध्यान दिएको दाबी गरे।

उनले स्थलगत अवलोकनका क्रममा पीडित परिवारको अवस्था सुनेपछि आफू सरकारको कार्यशैलीबारे संसद्मा बोल्न बाध्य भएको बताए। ‘सरकार सामाजिक सञ्जालमा अल्झियो। जोखिम समुदायमा समयमा पुग्न सकेन,’ उनले भने, ‘सरकार परिणाम दिन र प्राण जोगाउनभन्दा प्रचार मिलाउन लाग्यो। फिल्डमा भन्दा फेसबुकको हल्लामा लाग्यो।’

आङ्देम्बेले विपद्को समयमा तत्काल प्रभावित क्षेत्रमा पुगेर प्रभावकारी उद्धार तथा राहतलाई प्राथमिकता दिन सरकारलाई आग्रह गरे।