२ भदौ २०८३ काठमाडौं – देशभर एलपी ग्यासको बिक्रीवितरण उल्लेख्य रूपमा बढेको छ । नेपाल आयल निगमका अनुसार आज काठमाडौं उपत्यकामा मात्रै ५२ हजार ५७६ सिलिन्डर एलपी ग्यास बिक्रीवितरण भएको छ ।

निगमका अनुसार काठमाडौं उपत्यकाबाहेक अन्य जिल्लामा ७५ हजार १५८ सिलिन्डर ग्यास बिक्रीवितरण गरिएको छ । उपत्यकामा आज हालसम्मकै सबैभन्दा धेरै ग्यास बिक्रीवितरण भएको निगमले जनाएको छ ।

पछिल्ला दिनको तुलनामा आज ग्यासको बिक्री तथा वितरणमा उल्लेख्य वृद्धि भएको छ । आपूर्ति बढेसँगै बजारमा देखिएको ग्यास अभावसमेत क्रमशः सहज हुँदै गएको निगमको भनाइ छ । निगमले ग्यासको आपूर्ति बढाउँदै लगेपछि बजारमा उपभोक्ताले सहज रूपमा ग्यास पाउने अवस्था बन्दै गएको जनाएको छ ।