२२ जेठ २०८३ काठमाडौं – परराष्ट्रमन्त्री शिशिर खनाल औपचारिक भ्रमणका क्रममा भारतको राजधानी नयाँ दिल्ली पुगेका छन्। उनलाई नयाँ दिल्लीमा भारतका अतिरिक्त सचिव (उत्तर) मनु महावरले स्वागत गरेका हुन्।

भ्रमणका क्रममा मन्त्री खनालले भारतीय विदेशमन्त्री एस. जयशंकरसँग औपचारिक भेटवार्ता गर्ने कार्यक्रम रहेको छ। उक्त भेटमा नेपाल–भारत सम्बन्धका विविध पक्षहरूमा छलफल हुने जनाइएको छ।

छलफलका प्रमुख एजेन्डामा व्यापार, लगानी, कनेक्टिभिटी, ऊर्जा तथा जनस्तरको सम्बन्ध विस्तारलगायत विषय समावेश छन्। दुवै पक्षले द्विपक्षीय सम्बन्धलाई अझ सुदृढ बनाउने र आपसी सहकार्य विस्तार गर्ने विषयमा विचार आदानप्रदान गर्ने परराष्ट्र मन्त्रालयले जनाएको छ।

मन्त्री खनाल २४ गते स्वदेश फर्किने कार्यक्रम रहेको छ।