भृकुटीमण्डपमा भाडा नतिर्ने रिपोर्टर्स क्लबसहित २० कार्यालयमा तालाबन्दी

प्रकाशित मिति

२०८२ चैत्र ३० गते, सोमबार ०४:०१

काठमाडौं — समाज कल्याण परिषद्अन्तर्गत रहेको भृकुटीमण्डप क्षेत्रमा भाडा नतिर्ने सटरहरूमा तालाबन्दी गरिएको छ।वर्षौँदेखि भाडा नतिर्ने ५६ वटा सटरमध्ये सोमबार २० वटामा परिषद्का कर्मचारीले सुरक्षाकर्मीको सहयोगमा ताला लगाएका हुन्।

परिषद्का अनुसार लामो समयदेखि भाडा नतिर्ने व्यक्ति तथा संस्थाहरूलाई बारम्बार ताकेता गर्दा पनि अटेरी गरेपछि तालाबन्दीको कदम चालिएको हो। तालाबन्दी गरिएका सटरमध्ये रिपोर्टर्स क्लबसहित विभिन्न संस्थाका कार्यालय रहेका छन्।

परिषद्ले बाँकी सटरहरूमा पनि आवश्यक प्रक्रिया अगाडि बढाउने जनाएको छ।