११ चैत,२०८२ काठमाडौं- उज्यालो नेपाल पार्टीका अध्यक्ष कुलमान घिसिङले सडकबाटै सरकार चलाउने रणनीति अपनाउने बताएका छन्।

बुधबार काठमाडौँमा आयोजित बागमती प्रदेश स्तरीय अगुवा भेला तथा प्रशिक्षण कार्यक्रममा उनले मतदाताले सडकमा बसेर सरकार चलाउन म्यान्डेट दिएको बताए। उनले भने, “हामी सडकमा बसेर आम नेपाली जनताको सरकार चलाउने छौँ। देशको समस्या, विभेद र समृद्धितर्फ लैजान सशक्त भूमिका निभाउनेछौँ।”

घिसिङले सरकारलाई खबरदारी गर्ने र पार्टीको संगठन गाउँ–टोलसम्म विस्तार गर्ने योजना रहेको पनि जानकारी दिए। तर, फागुन २१ गते सम्पन्न निर्वाचनमा उज्यालो नेपाल पार्टीले एक सिट पनि जित्न सकेको थिएन।