१८ माघ,२०८२ काठमाडौं – जनता समाजवादी पार्टी (जसपा) नेपालका अध्यक्ष उपेन्द्र यादवले जनताद्वारा प्रत्यक्ष निर्वाचित कार्यकारी राष्ट्रपति प्रणालीले मात्र देशमा स्थिर, बलियो र जवाफदेही शासन व्यवस्था स्थापित गर्न सक्ने दाबी गरेका छन्।

आइतबार चुनावी अभियानका क्रममा सप्तरी–३ मा बोल्दै उनले बारम्बार सरकार फेरिने अस्थिर संसदीय अभ्यासले विकास, सुशासन र आर्थिक सुधारमा असर पारेको उल्लेख गरे। प्रत्यक्ष निर्वाचित राष्ट्रपति प्रणालीले शासनलाई स्थिर र जनताप्रति उत्तरदायी बनाउने उनको भनाइ छ।

अध्यक्ष यादवले जसपा नेपाल समानुपातिक तथा समावेशी प्रतिनिधित्वमा आधारित संसदीय संरचनाको पक्षमा अडिग रहेको पनि स्पष्ट गरे। चुनाव नजिकिँदै जाँदा पार्टीले यस प्रणालीलाई प्रमुख राजनीतिक एजेन्डाका रूपमा अघि सारेको छ।