श्रावण ३०,२०८२ काठमाडौं—बाँकेको नेपालगञ्ज उपमहानगरपालिका–४ मा प्रहरीले गोली हानेर लागुऔषध खैरो हेरोइन कारोबारमा संलग्न चार जनालाई नियन्त्रणमा लिएको छ। पक्राउ पर्नेमा नेपालगञ्ज–५ का २२ वर्षीय अमन साह, २६ वर्षीय भाइजन अन्सारी, भारतको बहराइज रुपैडिया थानाका २० वर्षीय अजयकुमार र २० वर्षीय कार्त्तिककुमार रहेका छन्।

लागुऔषध नियन्त्रण ब्युरो, शाखा कार्यालय नेपालगञ्जको टोलीले शंका लागेर खानतलासी गर्ने क्रममा ती व्यक्तिहरूले प्रहरीमाथि इँटा प्रहार गरेपछि गोली प्रहार गरिएको हो। घटनामा एक जना प्रहरी घाइते भएका छन्।

प्रहरीको गोली लागेर कार्त्तिककुमार घाइते भएका छन्। उनको दायाँ खुट्टामा गोली लागेको र उपचारका लागि अस्पताल पठाइएको प्रहरीले जनाएको छ।

उनीहरूको साथबाट प्रहरीले २६५ ग्राम खैरो हेरोइन बरामद गरेको छ।