श्रावण २९,२०८२ काठमाडौं — पशुपति आर्यघाटमा जलाउन लागिएको शवबाट हड्डी र खरानी निकालेर बेच्ने गिरोहमा संलग्न रहेको आरोपमा थप दुई जना पक्राउ परेका छन्।

पक्राउ पर्नेमा सर्लाही, लालबन्दी–२ स्थायी घर भई हाल काठमाडौं, बूढानीलकण्ठ–१२, कपन बस्ने ४२ वर्षीय रामनन्दन ठाकुर र सप्तरी, बलानबिहुल–६ स्थायी घर भई हाल काठमाडौं महानगरपालिका–७, गौरीघाट बस्ने ४१ वर्षीय मिश्रीलाल यादव रहेका छन्।

पक्राउ परेका ठाकुरको साथबाट प्लास्टिकको पोकोमा हड्डीको धुलो र खरानी जस्तो देखिने वस्तु बरामद भएको प्रहरीले जनाएको छ।

यसअघि प्रहरीले शवबाट हड्डी निकालेर बेचेको आरोपमा गणेशप्रसाद ढकाल (जीवनाथ ढकाल) र विनायक मैनालीलाई नियन्त्रणमा लिइसकेको थियो। २३ साउनमा दिउँसो पशुपति आर्यघाट–२ नम्बर चितामा जलिरहेको शवबाट उनीहरूले हड्डी र खरानी निकालेर बिक्री गरेको आरोप उनीहरूमाथि लागेको छ।

ढकाल र मैनालीलाई प्रहरी वृत्त गौशालामा हिरासतमा राखेर अनुसन्धान जारी रहेको छ।