श्रावण २७,२०८२ काठमाडौं — नापी कार्यालय कलंकीका कार्यालय सहयोगी एकेन्द्र कुँवर घुससहित रंगेहात पक्राउ परेका छन्। अख्तियार दुरुपयोग अनुसन्धान आयोगको टंगालस्थित टोलीले उनलाई कार्यालय परिसरमै १३ हजार रुपैयाँ घुससहित सोमबार पक्राउ गरेको हो।

कुँवरले चन्द्रागिरीस्थित जग्गा हालसाविक गरी नयाँ पूर्जा बनाउन आएका एक सेवाग्राहीसँग घुस मागेका थिए। सेवाग्राहीले अख्तियारमा सूचना दिएपछि आयोगले निगरानी गरेको थियो। निगरानीका क्रममा उनले मागेको रकम लिएपछि टोलीले पक्राउ गरेको हो।

अख्तियारका अनुसार, यस प्रकरणमा कार्यालय प्रमुख र सर्भेक्षकको संलग्नता हुनसक्ने देखिएको छ। आयोगले कार्यालय प्रमुखका दुईवटा मोबाइल र सर्भेक्षकको एकवटा मोबाइल बरामद गरेको छ। कुँवरको मोबाइल पनि बरामद गरिएको अख्तियारले जनाएको छ।