वासिंटन, अमेरिकी राष्ट्रपति डोनल्ड ट्रम्पले अमेरिकी जलसेनाले इरानी मानवरहित ड्रोन खसालेको दावी गरेका छन् । उनले अमेरिकी जलसेनाले आफ्नो पानीजहाज नजिक आएपछि रक्षात्मक कारवाहीका क्रममा स्ट्रेट अफ होर्मुजमा इरानी ड्रोन खसालेको बताए । तर, इरानले भने आफ्नो ड्रोन सम्पर्क्विहिन भएकोबारे कुनै जानकारी नरहेको जनाएको छ । गत जुनमा इरानले अमेरिकी जासुस ड्रोन विमान खसालेको थियो ।

यसअघि इरानको रिभोल्युसनरी गार्ड्सले खाडीमा तेल तस्करी गरेको आरोपमा विदेशी तेल ट्याङ्कर र १२ जना चालक दलका सदस्य कब्जामा लिएको जनाएको थियो ।
दश लाख लिटर तेल तस्करी गरेको आरोपमा स्ट्रेट अफ होर्मुजमा रहेको लाराक टापुको दक्षिणमा ट्याङ्कर कब्जामा लिइएको जनाइएको छ । मे र जुन महिनामा पनि इरानले दुई पटक ओमानको खाडीमा तेल ट्याङ्करहरूमाथि आक्रमण गरेको अमेरिकी आरोप छ । (एजेन्सी)