काठमाडौं, आकर्षक तलव हुने वर्किङ भिषामा युरोप पठाइदिन्छु भन्दै विभिन्न प्रलोभनमा पारी ठगी गरेको अभियोगमा एक युवा पक्राउ परेका छन् ।पक्राउ पर्नेमा काठमाडौं महानगरपालिका धापासी बस्ने चितवन रत्ननगर नगरपालिका—४ देवौली घर भएका ३१ वर्षीय नविनकुमार चौधरी रहेका छन् ।

चौधरीले प्रलोभनमा पारी विभिन्न व्यक्तिहरुसँग विभिन्न मितिमा करिब ५१ लाख ५० हजार रुपैयाँ लिई काठमाडौं हुँदै भारतसम्म पुर्‍याइ अलपत्र पारेर सम्पर्कविहिन भइ फरार रहेका थिए । महानगरीय अपराध महाशाखाबाट खटिएको प्रहरीले खोजी गर्ने क्रममा काठमाडौं टोखा नगरपालिका—६ स्थितबाट फेला पारी मंगलबार साँझ पक्राउ गरेको हो । चौधरीलाई आवश्‍यक अनुसन्धान तथा कारवाहीको लागि महानगरीय प्रहरी परिसर काठमाडौं पठाइएको महाशाखाले जानकारी दिएको छ ।