१६ असार २०८३ काठमाडौं – विषादी अवशेष द्रूत विश्लेषण प्रयोगशाला एकाइले मंगलबार गरेको परीक्षणमा भक्तपुरमा उत्पादन भई कालिमाटीमा बिक्रीका लागि ल्याइएको रायोको सागमा अत्यधिक मात्रामा विषादी भेटिएको छ। एकाइका अनुसार परीक्षण गरिएका १२ प्रकारका तरकारीमध्ये भक्तपुरको मध्यपुर थिमी नगरपालिका क्षेत्रमा उत्पादन गरिएको रायोको सागमा अर्गानोफस्फेट समूहको विषादी ८०.०१६० प्रतिशत फेला परेको हो।

निर्धारित मापदण्डअनुसार ३५ प्रतिशतभन्दा कम विषादी अवशेष भएको तरकारी उपभोग योग्य मानिन्छ भने ३५ देखि ४५ प्रतिशतसम्म भए क्वारेन्टिनमा राख्नुपर्ने हुन्छ। ४५ प्रतिशतभन्दा बढी विषादी भेटिएमा भने नष्ट गर्नुपर्ने व्यवस्था छ।

सोही मापदण्डअनुसार अत्यधिक विषादीयुक्त उक्त रायोको साग नष्ट गर्न निर्देशन दिइएको प्रयोगशाला एकाइले जनाएको छ।