७ असार २०८३ चितवन – राष्ट्रिय स्वतन्त्र पार्टी (रास्वपा) को प्रथम राष्ट्रिय महाधिवेशनको उद्घाटन सत्रमा नेपाली कांग्रेसका सभापति गगन थापा सहभागी हुने भएका छन्। सभापति थापाका स्वकीय सचिव शंकर कुइँकेलका अनुसार थापा रास्वपाको महाधिवेशन उद्घाटन कार्यक्रममा सहभागी हुन चितवन जाने कार्यक्रम रहेको छ।

हाल उनी काठमाडौंमा रहेका छन् र केही समयपछि चितवन प्रस्थान गर्ने तयारीमा छन्। यसअघि सभापति थापाले सामाजिक सञ्जालमार्फत रास्वपाको प्रथम महाधिवेशनको सफलताको शुभकामना व्यक्त गरिसकेका छन्।

चितवनमा आजदेखि सुरु भएको रास्वपाको प्रथम राष्ट्रिय महाधिवेशनलाई पार्टीको संगठनात्मक विकास र भावी नेतृत्व चयनका दृष्टिले महत्वपूर्ण मानिएको छ। महाधिवेशनमा देशभरबाट हजारौं प्रतिनिधिको सहभागिता रहने जनाइएको छ।