७ जेठ २०८३ काठमाडौं – नेपाल कम्युनिस्ट पार्टी (एमाले) ले पार्टी संगठनलाई थप प्रभावकारी बनाउने उद्देश्यसहित विभागीय प्रमुख र जनसंगठन इन्चार्जहरूको प्रस्तावित नाम सार्वजनिक गरेको छ । सोमबार बसेको पार्टी सचिवालय बैठकले विभिन्न विभाग, फाँट र जनसंगठनका जिम्मेवारीका लागि नेताहरूको नाम प्रस्ताव गरेको हो । पार्टीले आगामी शुक्रबार बस्ने सचिवालय बैठकबाट कार्यविभाजनलाई अन्तिम रूप दिने जनाएको छ ।

बैठकले प्रदीप ज्ञवाली लाई विदेश मामिला विभाग प्रमुखमा प्रस्ताव गरेको छ भने पद्मा अर्याल लाई संसदीय मामिला विभाग प्रमुखको जिम्मेवारी दिने प्रस्ताव गरिएको छ । त्यस्तै हिक्मत कार्की राष्ट्रिय हित संरक्षण विभाग प्रमुख, भानुभक्त ढकाल संगठन विभाग प्रमुख तथा डा. सूर्य पाठक प्रचार तथा प्रकाशन विभाग प्रमुखमा प्रस्तावित भएका छन् ।

पार्टी स्कुल विभाग प्रमुखमा शेरबहादुर तामाङ लाई प्रस्ताव गरिएको छ भने पर्यटन तथा नागरिक उड्डयन विभाग प्रमुखमा आनन्द पोखरेल लाई जिम्मेवारी दिने तयारी गरिएको छ । त्यसैगरी कल्पना चापागाईं समाज कल्याण तथा समाजसेवा विभाग प्रमुख, कर्ण थापा उद्योग, वाणिज्य तथा आपूर्ति विभाग प्रमुख तथा क्रान्ति बुर्लाकोटी युवा तथा खेलकुद विभाग प्रमुखमा प्रस्तावित भएका छन् ।

एमालेले कृषि, खानेपानी, भूमि व्यवस्था, सहकारी, वित्त, विज्ञान तथा प्रविधि, शिक्षा, कानुन, श्रम तथा रोजगार, वन तथा वातावरण, स्थानीय विकास लगायतका विभागमा पनि नेताहरूको जिम्मेवारी बाँडफाँट प्रस्ताव गरेको छ । पार्टीका विभिन्न जनसंगठन र फाँटहरूमा समेत इन्चार्ज तोक्ने तयारी गरिएको छ ।

प्रस्तावित सूचीअनुसार रामकुमारी झाक्री सहरी विकास विभाग प्रमुख, विन्दा पाण्डे श्रम तथा रोजगार विभाग प्रमुख तथा विशाल भट्टराई जनसंगठन समन्वय संयन्त्र प्रमुखमा प्रस्तावित भएका छन् । त्यस्तै युवा फाँट इन्चार्जमा क्षितिज थेवे, विद्यार्थी फाँट इन्चार्जमा रश्मी आचार्य, भारत प्रवास इन्चार्जमा हरिप्रसाद घिमिरे तथा महिला फाँट इन्चार्जमा टुकाभद्रा हमाललाई प्रस्ताव गरिएको छ ।

एमालेले नयाँ कार्यविभाजनमार्फत पार्टी संगठनलाई चुस्त बनाउने, जनसंगठनलाई सक्रिय बनाउने र आगामी राजनीतिक कार्यक्रमलाई प्रभावकारी रूपमा अघि बढाउने लक्ष्य लिएको जनाएको छ ।